Լուրեր

Ավարտում ենք մեր նոր ալբոմի ձայնագրությունը․ անվանել ենք «Անձրևաշուն»

Ավարտին ենք հասցնում մեր նոր ալբոմի ձայնագրությունը: Ձայնագրություններն արվել են Երևանում, Վանաձորում, Լոս Անջելեսում և Շառլոտում: Ներառված է տասը երգ: Զուգահեռ աշխատում ենք երկրորդ մասի վրա: Սպասեք նորությունների:

Երեք համերգ՝ ԱՄՆ-ում

2017 թ․ հոկտեմբերի 27-ին, 28-ին և 29-ին «Լավ Էլի»-ի խմբի Մհեր Մանուկյանն ու Գոռ Մխիթարյանը ակուստիկ համերգներ տվեցին ԱՄՆ-ի Լոս Անջելես և Սան Ֆրանցիսկո քաղաքներում:

Համերգներին նրանց միացան խմբի վաղեմի ընկերներ-երաժիշտներ Վարուժան Հովակիմյանը (բաս կիթառ), Արա Դաբանջյանը (ակորդեոն) և Ջոն Փըրֆիթը (մանդոլին): 

Խումբը երգեր ներկայացրեց ինչպես «Լավ Էլի»-ի հին երգացանկից, այնպես էլ նոր ձայնասկավառակից:  

Նվագեցինք «Այբ»-ի «Ռոքապատկերում» նախագծի համերգում

2017 թ․ հուլիսի 2-ին, «Այբ»-ի երեխեքի հավես «Ռոքապատկերում» նախագծի շրջանակներում, նվագեցինք հայկական մի շարք այլ ռոք խմբերի հետ:

Գաղափարը դպրոցի «Արվեստանոց» ակումբինն էր: Նախագծի շրջանակներում, կերպարվեստի ուսուցիչ ու ակումբի ղեկավար Մարի Ադամյանի գլխավորությամբ, մի խումբ պայծառ ուսանողներ ռոք ալբոմների համար շապիկներ պատրաստեցին: Նաև մեզ համար :)

Նախագծի մասին ֆիլմը դիտեք այստեղ:

Համերգ «Գաֆեսճյան» արվեստի կենտրոնում

Ապրիլի 26-ին նվագեցինք «Գաֆեսճյան» արվեստի կենտրոնում՝ որպես «Երաժշտության կասկադ» շարքի ելույթներից մեկը:

Ինչ ասեմ. հիանալի, ջերմ ու սրտաբաց հանդիսատես ունեինք, այդ թվում թե՛ հին, լավ բարեկամներ, թե՛ մեր երաժշտությանն առաջին անգամ ծանոթացողներ: Մի խոսքով, ոչ թե հանդիսատես, այլ իսկական պարգև:

Շնորհակալություն «Գաֆեսճյանի» ժողովրդին՝ հրավերի (և ոչ միայն) համար, իսկ «Երկիր մեդիա»-ին՝ նկարահանման:

Նվագեցինք հետևյալ կազմով.

«ԼԱՎ ԷԼԻ»

Համերգ Մարդու իրավունքների օրը՝ Վանաձորում

2012 թ․ դեկտեմբերի 11-ին «ԼԱՎ ԷԼԻ»-ն (Մհեր Մանուկյան, Դավիթ Գրիգորյան, Բագրատ Ազնաուրյան, Տիգրան Ոսկանյան, Շողեր Մանուկյան) ելույթ ունեցավ Վանաձորի Աբելյանի անվան պետական թատրոնի շենքում՝ Մարդու իրավունքների օրվան նվիրված ռոք փառատոնի շրջանակներում:

Համերգն անցավ շատ ջերմ մթնոլորտում, որի համար «ԼԱՎ ԷԼԻ»-ն անչափ երախտապարտ է:

Փառատոնին մասնակցում էին նաև «Դոգմա»-ն՝ Երևանից, «Բամբիռ»-ը՝ Գյումրիից և «Որդան կարմիր»-ը՝ Վանաձորից:

ՄԵՆԱՀԱՄԵՐԳ ՎԱՆԱՁՈՐՈՒՄ

2012 թ. հուլիսի 4-ին Վանաձորի կենտրոնական՝ Հայքի հրապարակում տեղի ունեցավ «LAV ELI» ռոք խմբի բացօթյա բացառիկ համերգը: Բացառիկ, որովհետև Աստված գիտե, թե երբ էր վերջին անգամ խումբը մենահամերգ տվել իր հարազատ քաղաքում: Եվ բացի այդ, համերգին մասնակցում էր նաև արդեն վաղուց ԱՄՆ-ում հաստատված Գոռ Մխիթարյանը՝ «ԼԱՎ ԷԼԻ»-ի հիմնադիրներից ու առանցքային անդամներից մեկը:

Համերգ Գաֆեսճեան կենտրոնում

2011 թ․ մայիսի 21-ին, ժամը 20:00-ից 23:00-ը, Մհեր Մանուկյանն ու իր ընկերները Գաֆեսճեան կենտրոնում ներկայացրեցին հիմնականում ակուստիկ ծրագիր՝ հին ու սիրված, նոր ու սիրված, նոր ու դեռեւս անծանոթ երգերից:

Համերգի անտրակտին հանդիսատեսները հնարավորություն ունեցան գնելու LAV ELI խմբի վերջին ալբոմը՝ թողարկված ԱՄՆ-ում:

Կարող եք այցելել նաև համերգի ֆեյսբուքյան էջը

Բաժանորդագրություն

Բաժանորդագրվեք կայքի նորություններին